Síminn skyggir á athyglina
Snjallsímar hafa mjög neikvæð áhrif á samskipti, samveru og samlíf í parasamböndum. Síminn á það til að skyggja á athyglina sem pörin veita hvort öðru og algengt er að tímanum sé fremur varið í símanum heldur en í almenn samskipti.
Þetta er meðal þess sem kemur fram í lokaverkefni Þórhildar Stefánsdóttur til BA-gráðu í félags- og fjölmiðlafræði.
Titill ritgerðarinnar er: „Ég nenni ekki að vera í einhverri keppni um athygli við símann hans,“ en allir sem Þórhildur tók viðtal við töluðu um skort á athygli þegar snjallsíminn var annars vegar, og hversu erfitt það getur verið að ná sambandi við maka og þau sjálf, þegar síminn er uppi við.
„Þetta kom mjög mikið á óvart að mörgu leyti en áhuginn kom auðvitað líka því mig grunaði að þetta væri svona. En niðurstöðurnar sýndu í raun eiginlega bara neikvæð áhrif,“ segir Þórhildur í samtali við mbl.is.
Verkefnið byggir á viðtölum Þórhildar við fimm einstaklinga á aldrinum 20 til 25 ára sem eiga eiga það sameiginlegt að vera í ástarsambandi og að eiga snjallsíma.
Einn viðmælandi sem játaði að hún og kærasti hennar eyddu töluverðum tíma í símanum í rúminu sagði notkunina hafa augljós áhrif á samlífið. „Við myndum 100% stunda meira kynlíf ef það væri ekki fyrir símana, alveg 100%,“ sagði hún. „Mann langar og hefði gert það ef síminn væri ekki en maður einhvern veginn bara festist í símanum og já, sorglegt en satt.“
Einn af viðmælendunum Þórhildar var mjög meðvitaður um stöðu sína og kærasta síns gagnvart snjallsímanum. Þegar viðtalið við hana var tekið voru hún og kærasti hennar hætt að sofa með snjallsímann í svefnherberginu og höfðu góða reynslu af því. Áreitið hafði truflað þau og nándin án símans varð meiri.
„Ég held að maður ætti miklu meira af gæðastundum með bara makanum sínum, vinum og fjölskyldu ef það væri ekki svona ótrúlega mikil snjallsímanotkun þannig já ég gæti alveg hugsað mér það,“ svaraði einn viðmælanda, spurður hvort hann gæti hugsað sér að lifa án snjallsímans. Aðrir tóku í sama streng. „Þetta er orðið sjúkt, fólk fattar ekki og nýtur ekki „mómentsins“ og lífsins út af einhverjum símum. Mjög margir, en ekki allir, sem eiga síma og samfélagsmiðla gera það og eru að missa af svo miklu.“