Kröftug mótmæli í París – Hélt sínu striki þrátt fyrir að vera augljóslega brugðið
Meðfylgjandi myndband hefur farið víða en þar má fréttakonu Russian Today vera slegna í höfuðið þar sem hún er flytja fréttir af vettvangi mótmæla í París. Það sem þykir aðdáunarvert er að fréttakonan heldur engu að síður sínu striki og vinnur sína vinnu líkt og ekkert hafi í skorist.
Það var síðastliðinn þriðjudag að kröftug mótmæli fóru fram í París á vegum hinnar svokölluðu Nuit debout-hreyfingar en verið var að mótmæla fyrirhuguðum breytingum á vinnulöggjöf landins. Umrædd fréttakona, Anna Baranova var stödd á vettvangi og bar hún hjálm á höfði til að gefa til kynna að hún væri á vegum fjölmiðils.
Líkt og sjá má á myndbandinu verður hún fyrir árás eins af mótmælendunum sem kemur upp að henni og veitir henni höfuðhögg. Annar mótmælandi klappar í kjölfarið, líkt og hann fagni árásinni. Augljóst er að fréttakonunni er nokkuð brugðið en hún heldur þó áfram og klárar fréttaflutninginn.
Þúsundir einstaklinga hafa lýst yfir stuðningi sínum við Baranova eftir að myndbandið var birt á netinu en í samtali við RT segir fréttakonan að hún hafi í raun verið meira hissa yfir atvikinu heldur en særð. Hún geri sér þó grein fyrir að ófáir mótmælendur líti á fjölmiðlafólk sem óvini, rétt eins og lögreglu og stjórnvöld.