Arnaldur Máni Finnsson, fréttamaður RÚV – Austurlandi og guðfræðingur er nýr ritstjóri Austurlands, landshlutablaðs Vefpressunnar og tekur við blaðinu um næstu mánaðarmót af Sigurði Ingólfssyni sem snúið hefur sér að öðrum verkefnum.
Arnaldur hefur viðamikla reynslu af atvinnulífi til sjávar og sveita, rekur Okkar eigin höfundasmiðjur og hefur starfað sem verkefnastjóri ýmissa menningarverkefna. Hann býr á Egilsstöðum ásamt maka sínum, Körnu Sigurðardóttur og á tvo syni.
Arnaldur mun leggja áherslu á breið efnistök í blaðinu og vonast eftir góðu samstarfi við Austfirðinga um að gera Austurland að enn víðlesnara blaði og öflugum vettvangi umfjöllunar um menningu og mannlíf. Fyrsta tölublað hans verður tileinkað sjómönnum og Sjómannadeginum. Af þessu tilefni verður útlit blaðsins og efnistök tekið til endurskoðunar. Arnaldur hefur áður starfað hjá BB á Ísafirði, ritstýrt Orðinu og skrifað fyrir ýmsa netmiðla og tímarit.
Útgáfusvæði Austurlands nær sunnan frá Höfn í Hornafirði norður til Vopnafjarðar og er blaðinu dreift í öll hús á þessu svæði. Hægt er að senda efni og ábendingar til nýs ritstjóra á austurland@pressan.is