„Því miður virðist ekki ætla að verða af komu hlýs lofts í vikunni, því norðanáttin virðist ætla að vera allsráðandi alveg fram á laugardag,“ segir á vef Veðurstofu Íslands um veðrið í vikunni næstu daga.

Nú er sauðburður ýmist hafinn eða að hefjast og því margir sem vonast eftir því að mildara loft fari að leika um landið. Einhver bið verður þó á því. „Enn er til að mynda þónokkur snjór um landið norðaustanvert,“ segir á vef Veðurstofunnar.

„Í dag er spáð norðan 5-13 m/s. Nú í morgunsárið er úrkoma austanlands og er hitastigið þannig að ýmist er um að ræða rigningu, slyddu eða snjókomu. Þetta úrkomubelti færist smám saman vestur á bóginn þegar kemur fram á daginn, yfir Norðurland og síðar Vestfirði. Á sunnanverðu landinu verður þurrt að kalla í dag og eitthvað sést til sólar.
Á morgun bætir í vindinn og verður hann allhvass í norðvestur fjórðungnum og með fylgir slydda eða snjókoma. Ekki er víst að ferðalög um fjallvegi gangi klakklaust fyrir sig á þessum slóðum. Sunnan- og austantil á landinu verður skárra veður, heldur hægari vindur og lítil eða engin úrkoma,“ segir enn fremur. Hér að neðan má sjá spá næstu daga.

Á þriðjudag:
Norðvestan og vestan 10-18 m/s, hvassast um landið norðvestanvert. Þurrt að kalla sunnan- og austanlands, annars rigning, slydda eða snjókoma, einkum norðvestantil. Dregur úr vindi og úrkomu um kvöldið. Hiti um eða rétt yfir frostmarki norðvestanlands, en allt að 8 stig á Suðausturlandi.

Á miðvikudag:
Norðan 5-15, hvassast norðvestanlands. Slydda eða rigning með köflum og hiti 0 til 4 stig, en bjart syðra og hiti 4 til 9 stig.

Á fimmtudag og föstudag:
Ákveðin norðan- og norðvestanátt með rigningu, slyddu eða snjókomu norðantil, en þurrt sunnanlands. Hiti breytist lítið.

Á laugardag:
Breytileg átt 3-8 og bjart með köflum, en stöku él á norðausturhorninu framan af degi. Hiti 2 til 9 stig, mildast sunnan heiða.

Á sunnudag:
Austlæg átt og dálítil væta sunnan- og austanlands, en þurrt annars staðar. Hiti víða 3 til 8 stig.