Jarðneskar leifar Alex Lowe, sem var í hópi fremstu fjallgöngumanna Bandaríkjanna á sínum tíma, fundust á dögunum, sextán árum eftir að Lowe hvarf sporlaust í Tíbet.
Alex var fertugur þegar hann freistaði þess að komast á topp Shishapangma í Himalaya-fjallgarðinum, en fjallið er það fjórtánda hæsta í heimi. Ógæfan dundi yfir í október 1999 þegar snjóflóð hreif Lowe og félaga hans, ljósmyndaranum David Bridges, með sér.
Ekkja Alex, Jenni Lowe-Anker, segir að fjallgöngumenn hafi fundið lík þeirra Alex og Davids á dögunum. Jenni segir í samtali við Outside-tímaritið að hún sé þakklát fyrir að jarðneskar leifar fyrrverandi eiginmanns hennar séu nú fundnar.
Conrad Anker, besti vinur Alex, lenti einnig í snjóflóðinu en komst lífs af. Hann kvæntist síðar eftirlifandi eiginkonu vinar síns, Jenni, og gekk þremur börnum hennar og Alexs í föðurstað. Jenni, Conrad og drengirnir þrír, sem nú eru fullorðnir, ætla að fara til Tíbet í sumar og ná í jarðneskar leifar þeirra Davids og Alex og koma þeim heim til Bandaríkjanna.