Fylgi Samfylkingarinnar hefur verið að hrapa síðustu mánuði og mælist nú einungis 8,3% samkvæmt nýrri könnun Gallup. Píratar tapa 9 prósentustigum en stjórnarflokkarnir bæta vel við sig.
Illugi Jökulsson rithöfundur hefur misst þolinmæðina og vill leggja niður Samfylkinguna, nánast í fúlustu alvöru. Hann hefur áður tjáð sig um lágt fylgi flokksins en á síðasta ári sagði hann að frjálslyndur jafnaðarmannaflokkur ætti að vera í dauðafæri að vinna hugsjónum sínum fylgi og til hans ætti að hópast fólk. Sagði Illugi það þyngra en tárum taki fyrir frjálslynda jafnaðarmenn líkt og hann sjálfan að fylgið þokaðist ekki upp á við á meðan í landinu væri ríkisstjórn sem gengi blygðunarlaust erinda auðvalds og sérhagsmuna.
Illugi er verulega ósáttur að ekkert hafi breyst á þessum tíma og segir í kvöld á Facebook:
„Mér finnst – nánast í fúlustu alvöru – að það ætti að leggja Samfylkinguna niður. Það er sama hvað gerist – hún hefur ekkert að segja, enginn lítur til hennar, enginn hefur áhuga á henni, enginn kemur til liðs við hana. Í miðri ömurlegri spillingar- og misréttisumræðu mælist hún með enn minnkandi fylgi.“