Lögreglu barst tilkynning um líkamsárás á Hótel Stracta á Hellu uppúr klukkan fimm í gærmorgun. Þar hafði gestur slegið annan gest í höfuðið með þeim afleiðingum að hann hlaut skurð á augabrún. Árásarþolinn vísaði lögreglu á árásarmanninn og er málið í rannsókn.
Eitt af þeim verkefnum sem rötuðu inn á borð lögreglu á tímabilinu frá 22. apríl síðastliðinn til 26. apríl var innbrot í sumarhús á Stokkseyri en þaðan var stolið 32” flatskjá.
Innbrotsþjófurinn hafði brotið rúðu með því að kasta blómakeri í hana. Blóðslettur voru hér og þar í húsinu sem bendir til að þjófurinn hafi skorist við að fara inn um gluggann.
Frá þessu greinir lögreglan á Suðurlandi en verkefni embættisins voru fjölmörg vikuna 26. apríl til 2. maí. Voru í heild 254 brot og verkefni skráð hjá lögreglunni í síðustu viku á svæðinu.
