Mótmælt við hús fjármálaráðherra
Lögreglan var kölluð að húsi Bjarna Benediktssonar fjármálaráðherra nú í kvöld. Þar mótmælti lítill hópur fólks. Stóð það á bak við hús Bjarna og fjölskyldu. Frá þessu greinir mbl.
Frægt var þegar boðað var til mótmæla á Facebook og skorað á fólk að mæta fyrir utan hús ráðherrans. Brugðust margir illa við og fannst of langt gengið. Árni Páll Árnason formaður Samfylkingarinnar sagði til að mynda:
„Fólk getur mótmælt við opinberar byggingar, en heimili fólks eiga að njóta friðhelgi.“
Grasrótarhópurinn Beinar aðgerðir boðaði til mótmæla (meðmæla) við heimili Bjarna Benediktssonar klukkan 19 að kvöldi 1. maí. Yfirskrift mótmælanna var Grillum á kvöldin – sækjum þau heim. Á Facebook síðu hópsins sagði:
,,Hópurinn hvetur alla landsmenn til að mæta í grillið með einnota grill, mat, tjaldstóla, trommur og góða skapið. Einnig er gott að æfa raddböndin aðeins og slagorð til þess að syngja. Látum þá ekki sitja eina að grilli og gróða á kostnað okkar hinna!“
Í kvöld mættu um tíu manns við hús Bjarna. Var lögreglan kölluð á staðinn til að tryggja öryggi Bjarna og fjölskyldu hans.