Langþráður draumur að ganga upp að altarinu í hvítum kjól
Hin 44 ára gamla Mette Skov hafði í mörg ár átt sér þann draum að ganga upp að altarinu í Nødebo kirkju í hvítum kjól. Gallinn var bara sá að draumaprinsinn var hvergi innan seilingar. Mette tók því til sinna ráða og síðastliðinn fimmtudag gekk hún að eiga sjálfa sig.
Mette fæddist með Downs heilkenni en í samtali við TV2 í Danmörku sagði systir hennar, Ditte Skov að Mette hefði ætíð þráð að gifta sig í stórum og miklum kjól, í glerskóm og með gullhringa en hingað til hefðu ástarsambönd hennar verið frekar stopul.
Draumur Mette snerist þó ekki beint um að finna brúðguma, heldur þráði hún fyrst og fremst að geta verið prinsessa í einn dag. Úr varð að iðjuþjálfi hennar og presturinn í Nødebo kirkju komu því í kring að Mette fengi draum sinn uppfylltan.
„Þetta var dásamlegt,“ sagði Rikke Skov, hin systir Mette í samtali við TV2 og bætti við að systir hennar hefði „ljómað eins og sólin“ á meðan brúðkaupsgestirnir hafi tárast, en jafnframt hafi þeir brosað út að eyrum. Presturinn lagði blessun sína yfir Mette í athöfn sem svipaði til hefðbundins brúðkaups.
„Ég hreinlega man ekki hvenær ég sá hana síðast jafn káta og hamingjusama,“ sagði systirin Ditte Skov jafnframt en draumadagur Mette hefði varla getað endað á betri hátt þar sem slegið var upp heljarinnar kökuveislu.