Erna Ýr Öldudóttir, formaður framkvæmdaráðs Pírata, steig til hliðar í gær á formlegum fundi framkvæmdaráðs Pírata. Helsta ástæðan var ágreiningur og að ekki hafði tekist að ráða framkvæmdastjóra í „ört stækkandi flokki með óteljandi skoðanir.“
Erna hefur verið nokkuð umdeild og lent nokkrum sinnum saman við Birgittu Jónsdóttur alþingismann. Líkt og kemur fram á Eyjunni lá hún undir ámæli eftir viðtal í sjónvarpsþættinum Eyjunni. Sagði Erna að mörkuð stefna Pírata um að næsta þing ætti að standa stutt og þar ætti fyrst og fremst að ganga í breytingar á stjórnarskrá væri ekki óumbreytanleg. Eftir þann þátt sagði Birgitta:
„Hún fer með formennsku í framkvæmdaráði sem hefur nákvæmlega ekki neitt pólitískt vægi, sér um að framkvæma hluti og halda félagsheimili Pírata þrifalegu og að borga leigu, tryggja aðstöðu fyrir grasrótina.“
Erna svaraði því eftirfarandi:
„Ég er ekki minna talsmaður flokksins en þú, þegar kemur að stefnumálum. Framkvæmdaráð hefur ekki heimild til að búa til stefnur, en það hefur þingflokkurinn ekki heldur. Félagsmenn hafa það í lýðræðislegu ferli innan flokksins.“
Erna hefur nú ákveðið að stíga til hliðar og líkt og greint er frá hér að ofan spilaði stórt hlutverk að ekki hafði tekist að ráða framkvæmdastjóra vegna fjárskorts, sjá hér. Erna segir í yfirlýsingu:
„Því miður kemur fyrirséð annríki nú í veg fyrir að ég geti sinnt hlutverki mínu áfram af þeim krafti og þeirri alúð sem þarf til að ljúka þeim verkefnum sem liggja fyrir, m.a. vegna þess að framkvæmdastjóri hefur enn ekki verið ráðinn.“
Halldór Auðar Svansson tjáir sig stuttlega um málið á Pírataspjallinu og segir þar:
„Mér finnst þetta tilefni til naflaskoðunar. Erna hefur verið dugleg við að synda á móti straumnum innan flokksins og það er ekki gott ef slíkt fólk fer að gefast upp. Enda vona ég nú að hún sé ekki alveg hætt.“
Þar eru viðbrögðin blendin. Þór Saari fyrrverandi alþingismaður sér ekki eftir Ernu og segir:
„Þekki hana ekki persónulega en hún hefur verið ötull talsmaður dólgafrjálshyggju SUS og Heimdellinga og meðal annars haldið því fram að Alan Greenspan væri sósíalisti. Það er til staður fyrir svona fólk, heitir Heimdallur og SUS. Hvað hún er að gera í Pírötum veit ég ekki.“