Árið er 2000 – Ríkisbankinn Landsbanki bauð fólki að kaupa í aflandssjóðum í öllum útibúum
Árin 1999 og 2000 auglýsti Landsbanki Íslands, sem þá var að fullu í eigu ríkisins, aflandsþjónustu í „alþjóðlegu fjármálamiðstöðinni“ á Guernsey á Ermarsundi. Guernsey flokkaðist sem „skattaskjól“ á þessum tíma og það varð ekki fyrr en undir lok árs 2008 að fjármálaráðuneytið gerði upplýsingaskiptasamning við eyjarnar Guernsey og Jersey á Ermarsundi að eyjarnar flokkuðust ekki lengur sem aflandseyjar.
Það vekur athygli að þessar auglýsingar birtust í Morgunblaðinu og voru heilsíðuauglýsingar. Önnur þeirra birtist á síðu 23, þriðjudaginn 7. desember árið 1999. Orðrétt segir í báðum auglýsingunum: Rekstur Fortuna sjóðanna fer fram á Guernsey, alþjóðlegri fjármálamiðstöð á Ermarsundi. Þar vaxa peningar í góðu skjóli og ná ávöxtun eins og hún gerist best í heiminum. Fortuna sjóðir Landsbankans, Fortuna I, Fortuna II og Fortuna III eru reknir af Landsbanki Capital International Ltd. á Guernsey.“
Fólki var bent á að það gæti komið við í næsta útibúi Landsbankans eða í höfuðstöðvum Landsbréfa og gengið frá kaupum í sjóðunum.
Í Morgunblaðinu í janúar 2000 er fjallað um aukna eftirspurn eftir aflandsþjónustu. Rætt var við Gunnar Þ. Andersen, framkvæmdastjóra alþjóða- og fjármálasviðs Landsbanka Íslands og stjórnarformann í Landsbanki PCC (Guernsey) Limited. Gunnar átti síðar eftir að verða forstjóri Fjármálaeftirlitsins á Íslandi. Einnig var rætt við Halldór J. Kristjánsson, bankastjóra Landsbankans. Hann sagði meðal annars: „Það sem fyrst og fremst vakti fyrir okkur þegar ákveðið var að bjóða upp á þessa tegund þjónustu var að við vildum breikka alþjóðlega þjónustu okkar og gefa kost á lögsögu, eins og Guernsey, sem sérhæfir sig í því að veita hagstæð skattaleg skilyrði til rekstrar og býður upp á einfaldar og ódýrar lausnir í alþjóðlegum viðskiptum. Við sáum mjög vaxandi þörf fyrir þessa þjónustu, bæði hjá fyrirtækjum og einstaklingum.“
Sigurður Atli Jónsson, forstjóri Kviku, var árið 2000 forstjóri Landsbréfa. Hann sagði í samtali við Morgunblaðið í sömu umfjöllun. „… í dag er það orðinn sjálfsagður hluti af þjónustuframboði banka að bjóða fjárfestum sínum upp á aflandsþjónustu í einhverju aflandsumdæmi. Langflestir stærri bankar í heiminum eru með starfsemi í slíku umdæmi og sumir þeirra í mörgum.“
Áhugavert er að rifja upp þessa umfjöllun í ljósi opinberana sem nú koma fram í tengslum stolnu gögnin frá Panama.