Árum saman bauð Seðlabankinn upp á leið til að skipta gjaldkeyri í krónur. Vilhjálmur Birgisson, verkalýðsleiðtogi á Akranesi, segir að ýmislegt þurfi að skoða varðandi þau mál og vitnar í frétt Kjarnans þar sem greint er frá því að Íslendingar hafi komið með 72 milljarða til landsins og fengið 17 milljarða í virðisaukningu. Upplýsingar um hvaða einstaklinga er að ræða fást ekki uppgefnar og því ekki mögulegt að bera saman nöfn í Panamaskjölunum.
Vilhjálmur fjallar um þessi mál í pistli á Pressunni og hefur eitt og annað við þau að athuga. Um 794 innlenda aðila er að ræða og segir Seðlabankinn að honum sé ekki heimilt að greina frá nöfnum þátttakenda í gjaldeyrisútboðum vegna þagnarskylduákvæðis sem bankinn sé bundinn af.
Vilhjálmur segir:
„Ég trúi ekki öðru en að ríkisskattstjóri óski eftir öllum upplýsingum um hverjir það eru sem komu með 72 milljarða í gegnum fjárfestingaleið Seðlabankans og fengu fyrir vikið 17 milljarða í bónus!“
Bætir Vilhjálmur við að ríkisskattstjóri hljóti að skoða málið og kanna hvort þetta fólk sem kom erlendis frá með 72 milljarða „hafi greitt skatta og skyldur hér á landi á meðan þeir voru með fjármunina erlendis.“
Vilhjálmur bætir við að lokum:
„Fyrirgefið en mikið ofboðslega er þetta allt saman eitthvað rotið og óréttlát!“