„Það kom hár hvellur og hvítur blossi – ekki beint það sem maður óskar eftir þegar maður er í flugvél“
„Fólk hélt nú ró sinni en var sennilega brugðið, allavega okkur,“ segir farþegi í vél Icelandair sem var á leið til Lundúna í gærkvöldi. Eldingu laust niður í vélina þegar hún var að koma til lendingar á Heathrow-flugvelli í gærkvöldi.
Breskir fjölmiðlar, til dæmis London Evening Standard, hafa fjallað um atvikið sem náðist á myndband af vegfarendum á jörðu niðri. Myndbandið má sjá hér að neðan.
„Þetta gerðist mjög hratt. Það kom hár hvellur og hvítur blossi – ekki beint það sem maður óskar eftir þegar maður er í flugvél,“ segir Liz Dobson sem var í vélinni ásamt eiginmanni sínum, Alexander Smith. Vélin var á leið frá Keflavík til London þegar atvikið varð.
„Það var eins og eitthvað hefði skollið á vélinni,“ segir Liz og bætir við að fólki hafi verið nokkuð brugðið. Hún segir að þegar vélin lenti hafi flugstjórinn tilkynnt að flugvélar væru hannaðar til að þola eldingar og ástæðulaust hefði verið að óttast.
Þrumuveður gekk yfir England í gærkvöldi og var vél Icelandair ekki sú eina sem lenti í því að verða fyrir eldingu, að því er fram kemur í frétt Standard.