Erlendur nemandi fékk smáskilaboð þess efnis að sprengja væri um borð
Nú stendur yfir leit um borð í Herjólfi vegna sprengjuhótunar sem barst í morgun. Hópur erlendra nemenda var á leið til Vestmannaeyja í morgun þegar einn úr hópnum fékk smáskilaboð þess efnis að sprengja væri um borð í ferjunni.
„Við viljum leita af okkur allan grun og á ég von á að sprengjusveit Landhelgisgæslunnar stjórni leitinni“ segir Ólafur Hand, upplýsingafulltrúi Eimskipa, í samtali við Eyjar.net, sem greinir frá málinu.
Ólafur segir að Eimskip líti málið mjög alvarlegum augum og málið komi til með að verða rannsakað af lögreglu. Leitað verður í öllu skipinu og er ekki ljóst á þessari stundu hvenær skipið getur haldið áfram áætlun sinni.