„Lögreglukonan spurði mig hversu stuttu pilsi ég hafi verið í og hversu marga drykki ég hafi drukkið,“ segir ung íslensk stúlka, Heiðrún Mjöll Bachmann, í viðtali í Fréttablaðinu í dag.

Heiðrún, sem er 21 árs, hefur undanfarið dvalið sem au pair hjá íslenskri fjölskyldu í Mið-Ameríkuríkinu Níkaragva. Heiðrún lagði fram kæru síðastliðinn föstudag vegna nauðgunar. Hún segir að maðurinn hafi ekki enn verið handtekinn eða yfirheyrður. Maðurinn mun hafa verið kosinn Herra Níkaragva ekki alls fyrir löngu og er hann sagður landsþekktur. „Þessi maður er andlit Níkaragva. En ég get ekki leyft honum að komast upp með þetta,“ segir Heiðrún meðal annars.

Þau kynntust í ræktinni og fór svo að þau fóru saman í gleðskap á fimmtudagskvöldið. Þar segir Heiðrún að sér hafi verið nauðgað eftir að hafa verið byrlað ólyfjan. Hún hafi fengið sér að drekka en það næsta sem hún muni var þegar hún rankaði við sér á hótelherbergi með manninn liggjandi við hliðina á sér.

„Mig rámar í að hann hafi verið að kyssa mig og snerta mig og ég segi nei. En svo datt ég út aftur. Ég vakna svo um morguninn og þá nauðgar hann mér. Ég reyndi að ýta honum í burtu og segja honum að hætta, en ég var svo máttlaus og fann að ég átti enga von um að losna. Þegar hann lýkur sér af kem ég mér út og bið vinkonu mína að sækja mig. Fyrst ætlaði ég ekki að tilkynna þetta, ég er í ókunnugu, þriðja heims landi og nauðgun er nýlega skilgreind sem glæpur sem hægt er að kæra. Mér fannst þetta vonlaus staða,“ segir Heiðrún meðal annars í viðtalinu. Hún hefur þvælst á milli lögreglustöðva, heilsugæslu og farið í sálfræðimat og skoðanir.

Hér er hægt að lesa viðtalið við Heiðrúnu.