Átta manns úr sömu fjölskyldunni myrtir – Lögreglan útilokar ekkert
Morðin á átta einstaklingum úr sömu fjölskyldunni í Ohio á föstudag hafa vakið upp margar spurningar á undanförnum dögum. Málið þykir allt hið dularfyllsta enda virðist ódæðið hafa verið þaulskipulagt og beinst að meðlimum einnar fjölskyldu.
Átta manneskjur voru skotnar til bana, en svo virðist vera sem fólkið hafi verið skotið í höfuðið meðan það svaf. Allir tilheyrðu sömu fjölskyldunni; Rhoden-fjölskyldunni svokölluðu. Saksóknarinn í Ohio, Mike DeWine, hefur ekki viljað staðfesta eða neita þeim getgátum sem verið hafa á lofti um ódæðin.
Það er hins vegar staðreynd að fullkomnar kannabisverksmiðjur hafi fundist á þremur af fjórum heimilum þeirra sem myrtir voru. Þá fundust svokallaðir bardagahanar í búrum á við eitt heimilið, en veðmálabrask í kringum slíka ræktun hefur lengi viðgengist, til dæmis í Mexíkó.
„Þetta var umsvifamikil kannabisræktun. Með öðrum orðum þá voru þetta ekki nokkrar plöntur úti í glugga eða eitthvað á þá leið. Þau voru að rækta til að selja,“ segir Mike við Washington Post.
CBS News greindi frá því í dag að meira en 60 manns hafi verið yfirheyrðir vegna málsins. Gerandinn er ófundinn og hefur enginn verið handtekinn í tengslum við morðin. Segir lögregla að þar sem árásirnar hafi beinst gegn þessari einu fjölskyldu meti lögregla það svo að almenningi stafi ekki hætta af gerandanum. Fórnarlömbin voru á aldrinum 16 til 44 ára en morðin voru sem fyrr segir myrt á fjórum stöðum í Pike-sýslu í Ohio.
Í umfjöllun CBS News er því velt upp hvort mexíkósk glæpasamtök hafi verið viðriðin morðin. Sú staðreynd að rúmlega 200 kannabisplöntur hafi fundist veki upp spurningar og það hvernig fólkið var myrt minni á aðferðir mexíkóskra eiturlyfjasamtaka. Lögregla hefur ekki viljað útiloka neitt, ekki hvort erlend glæpasamtök hafi verið á verki, ekki hvort málið tengist skipulagðri glæpastarfsemi eða hvort um einhverskonar hefnd hafi verið að ræða.
Columbus Dispatch fjallar um málið líkt og aðrir fjölmiðlar og þar er rætt við Lauru Gorman, íbúa í Piketon sem telur ekki nema rúmlega tvö þúsund íbúa. Hingað til hefur bærinn ekki verið þekktur fyrir ofbeldisglæpi og segist Laura ekki geta ímyndað sér að einhver í bænum hafi framið ódæðin.
„Ég kemst ekki hjá því að velta fyrir mér hvort þau hafi öskrað, hvort þau hafi getað barist á móti, hvort þau hafi þjáðst,“ segir hún og bætir við að hún velti fyrir sér hver hafi komið í þorpið um miðja nótt og myrt fjölskylduna. Voru það reiðir vinir eða var ódæðismaðurinn – eða mennirnir – á vegum glæpasamtaka? „Vanalega geymum við byssurnar okkar í læstum hirslum. Nú, þegar kvölda tekur, tökum við þær út,“ segir Laura og bætir við að íbúar séu harmi slegnir vegna morðanna.