Leit er nú lokið um borð í Herjólfi og fannst engin sprengja um borð í ferjunni. Erlendur nemandi, sem fór með skipinu til Vestmannaeyja í morgun, fékk sent smáskilaboð þess efnis að sprengja væri um borð og var viðbragðsaðilum gert viðvart í kjölfarið.

Mbl.is greinir frá því að leit sé nú lokið og að engin sprengja hafi fundist. Skipið mun nú vera lagt af stað frá Vestmannaeyjum til Landeyjahafnar.

Gunn­laug­ur Grett­is­son, rekstr­ar­stjóri Herjólfs, segir við mbl.is að nemandinn hafi brugðist rétt við þegar hann setti sig í samband við skipstjórnendur. Þá hafi skipstjórnendur einnig brugðist rétt við með því að hafa samband við lögreglu.

Gunnlaugur segist hafa óstaðfestar fréttir að sprengjuhótunin hafi verið tilkomin vegna víruss í síma nemandans. Það virðist Páley Borgþórsdóttir, lögreglustjóri í Vestmannaeyju, staðfesta.

Hún segir að um hafi verið að ræða hotspot-hótun sem er tiltölulega auðveld í framkvæmd. „Þeir sem þekkja til segja að það sé tiltölulega auðvelt að gera þetta, setja hótanir inn á vefsvæði þar sem er þráðlaust net og þá fer sendingin á símann sem fer fyrstur á netið. Þessu var ekki beint til stúlkunnar, þessu er bara beint inn á þetta opna vefsvæði,“ segir Páley við mbl.is.

Páley seg­ir að hót­an­ir sem þess­ar séu til­tölu­lega al­geng­ar. „Sum­um kann að þykja þetta sniðugur hrekk­ur, sem það er alls ekki. Það er til­tölu­lega al­gengt að svona sé sett inn á opin vefsvæði án þess að nokk­ur fót­ur sé fyr­ir því,“ seg­ir hún.