– Breytingar á stjórn Icelandic Group – Áherslurnar „nú skýrari“
Stjórnarmönnum Icelandic Group, sem er í eigu Framtakssjóðs Íslands, var nýverið fækkað úr fimm í þrjá í kjölfar sölu fyrirtækisins á starfsemi þess í Asíu. Herdís Dröfn Fjeldsted, stjórnarformaður Icelandic Group, segir í samtali við breska sjávarútvegsvefinn Undercurrent News að áherslur fyrirtækisins „séu nú skýrari“.
Þau Ævar Agnarsson, fyrrverandi forstjóri Icelandic USA, og Björk Vilhjálmsdóttir, yfirmaður í mannauðsdeild Icelandic Group, hættu í stjórn fyrirtækisins. Að sögn Herdísar kom breytingin í kjölfar sölunnar á starfseminni í Asíu, sem útgerðarfyrirtækið Brim hf. keypti í desember síðastliðnum, og breyttra áherslna í rekstrinum. Við söluna til Brims bókfærði Icelandic tap upp á 3,9 milljónir evra, eða 548 milljónir króna, vegna þess hluta starfseminnar.
Icelandic Group, sem framleiðir og selur sjávarfang og á fjórtán dótturfélög, er í eigu 18 lífeyrissjóða og Landsbankans í gegnum Framtakssjóð Íslands. Fyrirtækið skilaði ríflega 560 milljóna hagnaði í fyrra og sneri við taprekstri ársins 2014 sem nam 710 milljónum. Virðisrýrnun viðskiptavildar Icelandic – Ný Fisks, dótturfélags sem Icelandic Group keypti í janúar 2014, upp á 770 milljónir króna, skýrði að mestu tap fyrirtækisins það ár.