„Safngripirnir eru ekki komnir í geymsluna að nýju en nú höfum við fengið framkvæmdafé til að ráðast í lagfæringar á henni,“ segir Sigurjón Örn Þórsson, framkvæmdastjóri Kringlunnar, aðspurður hvort búið sé að læsa á ný geymslu sem stendur við eitt af bílastæðum verslanamiðstöðvarinnar og geymdi áður um 1.000 vörur sem verslanir hennar seldu árið 1999.

Geymslunni var læst þegar ný viðbygging Kringlunnar var opnuð rétt fyrir síðustu aldamót. Þá höfðu kaupmenn í verslanamiðstöðinni látið af hendi ýmsar vörur sem eru til marks um tíðarandann árið 1999. Geymslan átti að vera læst í yfir hundrað ár, eða þangað til Kringlan yrði rifin, en eins og DV fjallaði um í apríl í fyrra þá lak vatn inn í geymsluna og hluti munanna, sem starfsmenn Þjóðminjasafns Íslands mynduðu og skráðu niður á sínum tíma, skemmdist.

Framkvæmdastjórinn Sigurjón Örn Þórsson segir starfsmenn Kringlunnar hafa þurft að flytja safngripina í aðrar geymslur eftir að lekinn uppgötvaðist.

„Við ætlum okkur að koma í veg fyrir að rakinn vinni á þessu og leggja hita í geymsluna. Svo verða þeir munir sem eftir standa, og urðu ekki fyrir skemmdum, fluttir aftur þangað inn. Síðan eru aðrir hlutir hér í geymslum sem fara einnig þarna inn fyrir fornleifafræðinga framtíðarinnar. Þessi útiverk bíða vorsins og sumarsins.“

Líkt og kom fram í DV í fyrra þá kviknaði hugmyndin að geymslunni meðal hönnuða bílastæðisins sem er fyrir framan inngang Borgarleikhússins. Myndlistarmaðurinn Kristinn E. Hrafnsson sagði í samtali við dagblaðið Dag í september 1999 að ætlun þeirra væri að „frysta eitt neysluaugnablik í Kringlunni“. Safnið innihélt meðal annars leikföng, heimilistæki, fatnað, raftæki og Barbie-dúkkur. Sigurjón segist ekki vita hversu stór hluti safnsins skemmdist.

„Ég hugsa að það sem var taukennt hafi þolað rakann verst. Það voru svo sem alls konar hlutir þarna. Þetta var tilraunaverkefni og það hefði verið æskilegt að frágangur þess í upphafi hefði verið betri. Nema það hafi verið hugsun manna að láta tímans tönn vinna á þessu,“ segir Sigurjón.