Ólafur hyggst gefa kost á sér í sjötta skiptið
Ólafur Ragnar Grímsson hefur ákveðið að gefa kost á sér til embætti forseta Íslands á ný. Þetta kom fram á blaðamannafundi með forsetanum á Bessastöðum fyrir skömmu. Það er þá í sjötta skiptið sem Ólafur Ragnar gefur kost á sér, en hann hefur setið lengst af öllum forsetum í lýðveldissögunni.
Uppfærð 16:25
Ólafur Ragnar Grímsson sagði í tilkynningu sinni að pólitískt umrót undanfarinna vikna hafi haft afgerandi áhrif á ákvörðun sína að bjóða sig fram í sjötta skiptið. Það er að segja þegar Sigmundur Davíð Gunnlaugsson ákvað að segja af sér eftir að í ljós kom að eiginkona hans var með eignarhaldsfélag á láskattasvæði.
Ólafur Ragnar segir hið pólitíska ástand enn viðkvæmt eftir hrunið og að kjörnir fulltrúar verði að vanda sig. Hann segir ennfremur að umrótið hafi orðið til þess að fjölmargir hafi leitað til sín og skorað á sig að gefa kost á sér á ný. Hann hafi því ákveðið að verða við þeirri bón.