„Ef greitt væri úr sjóðnum yrðu greiðslurnar skattskyldar á Íslandi,“ segir Júlíus
Júlíus Vífill Ingvarsson, borgarfulltrúi Sjálfstæðisflokksins, sendi frá sér yfirlýsingu í dag þar sem fram kemur að hann hafi stofnað vörslusjóð í svissneskum banka. Júlíus segir allt sem snúi að sjóðnum í samræmi við íslensk lög og lúti sömu reglum og sjálfseignarstofnun. Segist hann ekki hafa fengið greitt úr sjóðnum eða haft úr honum tekjur en hugmyndin hafi verið að stofna eigin eftirlaunasjóð.
„Ef greitt væri úr sjóðnum yrðu greiðslurnar skattskyldar á Íslandi,“ segir Júlíus. Sérfræðiráðgjafar hafi tryggt að löglega værir staðið að málum en honum hafi verið ráðlagt að skrá stofnun sjóðsins í Panama. Júlíus biðst í yfirlýsingu sinni velvirðingar á að hafa ekki látið sjóðsins getið fyrr: „Enda þótt þess sé ekki krafist að geta eftirlaunasjóðs í hagsmunagreiningu borgarfulltrúa tel ég, eftir á að hyggja, að betur hefði farið á því.“ Nánar er fjallað um málið á mbl.is.
Eyjan greindi einnig frá því í dag að Hrólfur Ölvisson, framkvæmdastjóri Framsóknarflokksins, tengdist tveimur félögum sem skráð voru á Tortóla.