Noel Santillan, áttavillti ferðalangurinn sem ók óvart alla leið frá Keflavík til Siglufjarðar en ætlaði til Reykjavíkur, er farinn úr landi. Noel fór þó ekki tómhentur aftur til heimalands síns, Bandaríkjanna, þar sem hann fékk GPS-tæki að gjöf fyrir heimferðina.

Frá Facebook. Hér má sjá Noel með GPS-tækið frá Avis.

Frá þessu greindi Noel á Facebook-síðu sinni í gær en það var bílaleigan Avis, sem leigði Noel bíl á meðan hann dvaldi hér á landi, sem gaf honum staðsetningartækið. Noel sagðist hafa viljað hitta konuna sem afgreiddi hann við komuna til landsins en hún var ekki við í gær.

„Ég hitti yfirmanninn og hluta af starfsliðinu. Þeir gáfu mér GPS-tæki fyrir næstu ferð,“ sagði Noel, ánægður með gjöfina.

Noel varð í síðustu viku landsfrægur eftir að hann gerði þau mistök að stimpla inn heimilisfangið Laugarvegur 22a í staðinn fyrir Laugavegur 22a í GPS-tæki við komuna til landsins. Noel treysti tækinu og fylgdi því alla leið á áfangastað. Noel endaði því á Siglufirði en ekki í miðbæ Reykjavíkur, þar sem förinni var upphaflega heitið.

Noel sagði í viðtali við DV ,daginn eftir að hann kom til Siglufjarðar, að ferðin hefði tekið hann um fimm klukkustundir. Hann viðurkenndi að það hafi verið mikil mistök að fylgja GPS-tækinu í blindni en var þó yfir sig ánægður með móttökurnar á Siglufirði.

„Ég kom hingað til að lenda í ævintýri og nánast um leið og ég steig úr flugvélinni var ég lentur í mesta ævintýri lífs míns,“ sagði Noel í samtali við DV.

Sjá einnig: Noel var mjög hissa þegar hann endaði á Siglufirði: „Lenti strax í ævintýri á Íslandi“

Ferðasaga Noels vakti eins og fyrr segir mikla athygli og náði hún út fyrir landsteinana en erlendir fjölmiðlar, bæði í Ameríku og í Evrópu fjölluðu um ferðasögu Noels. Það má því segja að Noel hafi orðið heimsfrægur eftir Íslandsferðina.

Noel villtist svo í annað sinn í ferðinni, þegar hann ætlaði í Bláa lónið. Í stað þess að fara í lónið sjálft endaði hann á skrifstofu Bláa Lónsins.

Íslendingar tóku vel á móti Noel hvert sem hann fór og segist hann vera afar ánægður með ferðina til landsins.

„Sjáumst fljótt aftur Ísland. Það var sönn ánægja og heiður að vera þarna,“ sagði frægasti ferðamaður Íslands áður en hann yfirgaf landið.