Borgun segist aldrei hafa búið yfir upplýsingum um hvort, hvenær né á hvaða verði Visa Europe yrði selt
Landsbankinn hafði aðgang að öllum gögnum í tengslum við sölu á 31,2% hlut bankans í Borgun í nóvember á síðasta ári.
Þetta kemur fram í yfirlýsingu sem Borgun hefur sent frá sér í tilefni þess að Landsbankinn óskaði eftir svörum frá greiðslukortafyrirtækinu um hvaða upplýsingar stjórnendur félagsins höfðu vegna mögulegra valréttargreiðslna við yfirtöku Visa Inc. á Visa Europe.
Í yfirlýsingunni segir að útbúið hafi verið sérstakt gagnaherbergi þar sem Landsbankinn og aðrir aðilar máls höfðu fullan aðgang að ítarlegum upplýsingum um Borgun og rekstur félagsins. „Þar lágu fyrir upplýsingar um aðild og eignarhlut Borgunar í Visa Europe sem og upplýsingar um valréttarákvæði milli Visa Inc. og VISA Europe,“ segir í yfirlýsingunni.
Þá segist Borgun aldrei hafa búið yfir upplýsingum um hvort, hvenær né á hvaða verði Visa Europe yrði selt, fyrr en salan var gerð opinber þann 2. nóvember 2015. „Vænt hlutdeild Borgunar í söluandvirði á VISA Europe varð ekki ljós fyrr en 21. desember sama ár. Fyrir þann tíma hafði Borgun engar forsendur til þess að meta eignarhlut sinn í Visa Europe á annan hátt en gert var.“
Að sögn Borgunar þá mun fyrirtækið veita Landsbankanum allar þær upplýsingar tengdar söluferli, sem nauðsynlegar eru vegna fyrirspurna Bankasýslu ríkisins og annarra opinberra aðila.