Sérstakur saksóknari hefur gefið út ákæru á hendur Einari Ágústssyni fyrir umfangsmikil fjársvik og gjaldeyrisbrot. Einar og bróðir hans, Ágúst, voru meðal annars til umfjöllunar í Kastljósi á síðasta ári en þeir hafa leitt stórar hópfjármagnanir á vefnum Kickstarter.

Í frétt RÚV kemur fram ákæran sé upp á fimmtán blaðsíður. Honum er meðal annars gefið að sök að hafa fengið Íslendinga til að leggja rúmar sjötíu milljónir til eignarhaldsfélagsins Skajaquoda, en samkvæmt ákæru hélt Einar því fram að hann starfrækti fjárfestingarsjóð undir þessu nafni í Bandaríkjunum. Öll gögn benda þó til þess að sjóðurinn hafi aldrei verið stofnaður.

Samkvæmt ákæru voru brotin þaulskipulögð, en Einar er sagður hafa sent viðkomandi upplýsingar um góða ávöxtun fjármuna í sjóðnum.

Þá er Einar ákærður fyrir umfangsmikil brot á lögum um gjaldeyrismál. Á tæplega tveggja ára tímabili, frá því í október 2011 til júlí 2013 sendi hann með símgreiðslum erlendan gjaldeyri upp á rúmar 220 milljónir króna. Keypti hann gjaldeyrinn af Íslandsbanka án þess að peningurinn væri notaður í vöru- eða þjónustuviðskipti eins og lög kveða á um.
Þess er krafist að Skajaquoda verði látið sæta upptöku á rúmum 67 milljónum sem embætti sérstaks saksóknara lagði hald á í júlí 2013.

Sjá frétt RÚV