Talin drífa lengra en fyrri flaugar – Yfirvöld í Norður-Kóreu segja að um rannsóknargervihnött sé að ræða
Öryggisráð Sameinuðu þjóðanna hélt í dag neyðarfund til þess að ræða hvernig bregðast ætti við nýjasta eldflaugaskoti Norður-Kóreumanna. Fundurinn var haldinn að beiðni Bandaríkjamanna, Suður-Kóreumanna og Japana.
Fyrr í dag tilkynntu yfirvöld í Norður-Kóreu að þeim hefði tekist að skjóta langdrægri eldflaug á loft í morgun. Í tilkynningu í ríkissjónvarpi landsins var greint frá því að skotið hefði heppnast fullkomlega og eldflaugin hefði komist út fyrir himinhvolfið um átta mínútum eftir flugtak.
Þar var greint frá því að eldflaugin hefði borið rannsóknargervihnött sem væri nú á sporbaug umhverfis jörðina. Þá sagði fréttakonan sem las upp tilkynninguna að eldflaugarskotið myndi hafa gífurlega jákvæð áhrif á efnahag landsins.
Leiðtogar um allan heim hafa fordæmt tilraunir stjórnvalda í Norður-Kóreu og sagt að þeim verði refsað, en með tilraun sinni brutu Norður-Kóreumenn samkomulag um að stöðva þróun langdrægra eldflauga.
Í frétt Guardian segir að stjórnvöld í Norður-Kóreu hafi tilkynnt rússneska sendiráðinu í Pyongyang að fleiri tilraunir yrðu framkvæmdar á næstunni.
Sérfræðingar telja að eldflaugin, sem skotið var upp í morgun, sé sú fullkomnasta sem Norður-Kóreumenn hafa skotið á loft og gæti jafnvel náð til Bandaríkjanna.
John Kerry, utanríkisráðherra Bandaríkjanna, sagði litið væri á tilraun Norður-Kóreumanna sem „ögrun“ sem ógnaði ekki aðeins friði á Kóreu-skaganum heldur einnig í Bandaríkjunum.
Stutt er síðan Öryggisráðið kom saman til að ræða frekari refsiaðgerðir gegn Norður-Kóreu eftir að stjórnvöld þar í landi sprengdu sína fjórðu kjarnorkusprengju, sem þau sögðu að hefði verið vetnissprengju.
Hér má sjá myndband, sem birt var í norðurkóreska ríkissjónvarpinu, af því þegar eldflauginni var skotið á loft.