Birgitta Jónsdóttir segir að það blundi ekki í henni að verða forsætisráðherra. Skoðun hennar er sú að fólk eigi að veljast í stöður eftir hæfileikum. Birgitta var gestur Björns Inga í þættinum Eyjan á Stöð 2. Í frétt Eyjunnar segir að Birgitta sé ákveðin í að bjóða sig aftur fram fyrir Pírata í næstu kosningum en líkt og greint hefur verið frá á dv.is skipti Birgitta um skoðun til að koma í veg fyrir að frjálshyggjumenn tækju yfir Pírata. Frjálshyggjumenn sökuðu Birgittu á móti um að svíkja fyrri yfirlýsingar sínar nú þegar kosningar nálgast af ótta við að missa af þægindum og fríðindum sem fylgja þingmennskunni.
Í Eyjunni sagði Birgitta að hún vildi geta stutt nýja þingmenn Pírata. Ekki séu margir reynsluboltar í flokknum. Sagði hún óábyrgt af sér að fara frá borði á þessari stundu.
Þegar Birgitta var spurð hvort hún væri umdeild innan Píratahreyfingarinnar svaraði hún:
„Ég er bara svona persóna, að annað hvort hatar fólk mig eða fólk elskar mig. Það er ekkert þar á milli og ég er alveg vön því.“
Þá spurði Björn Ingi hvort hún væri að stilla sér upp sem forsætisráðherraefni. Sagði Birgitta að meta þyrfti eftir kosningar hver væri hæfur til að gegna embættinu. „Það blundar ekki lítill forsætisráðherra í maganum á mér,“ bætti Birgitta við.
Hér má horfa á þáttinn í heild sinni.