Kári Stefánsson, forstjóri Íslenskrar erfðagreiningar, baðst í morgun afsökunar á ummælum sem hann lét falla um Sigmund Davíð Gunnlaugsson, forsætisráðherra, í viðtali í Reykjavík Grapevine. Frá þessu greindi Kári í viðtali við Helga Seljan í útvarpsþættinum Vikulokin á Rás 1 í morgun.

Í viðtalinu sagðist Kári ekki eiga í deilum Sigmund Davíð og spurði blaðamann Reykjavík Grapevine:

„Hvers vegna ætti ég að eiga í deilum við þennan litla tveggja ára offitusjúkling?“

Sjá einnig: „Hvers vegna ætti ég að eiga í deilum við þennan litla tveggja ára offitusjúkling“

Kári sagði að hann hafi ekki verið alveg nógu skýr í viðtalinu og því hafi ummælin komið svona út. Þá telur hann líklegt að eitthvað hafi misfarist í þýðingu og mögulega hafi blaðamaður Grapevine ekki náð inntaki orða hans nægilega vel. Því hafi þetta litið verra út en hann ætlaði.

Kári sagði að skýringin á þessum orðum hans hafi verið sú að samstarfsmaður hans hjá Íslenskri erfðagreiningu hafi á dögunum sagt um Kára og Sigmund að þeir væru eins og tveir, feitir, tveggja ára drengir sem væru að rífast um leikfang.

Kári baðst afsökunar á þessum ummælum í viðtalinu við Helga og sagði jafnframt að hann bæri virðingu fyrir Sigmundi Davíð, hann væri snjall maður þó að þeir deildu nú um stöðu heilbrigðiskerfisins.

„Þessi skítur er á mína ábyrgð, þessa lotu vann forsætisráðherra 10-0. Þó forgangsröðin sé ekki rétt hjá honum hvað varðar heilbrigðiskerfið,“ sagði Kári.