Martina Klara myndbirti bílaþjóf sem henti hundinum hennar út úr bílnum eftir að hafa stolið honum
„Við rétt stukkum inn til þess að sækja mat á Subway. Bílnum var stolið á meðan,“ segir Martina Klara Maríudóttir sem lenti í þeirri ógæfu á dögunum að bíl hennar og kærasta hennar var stolið. Það sem verra var; chihuahua hundurinn Snabbi var um borð í bílnum þegar honum var stolið.
„Það var svo kalt, þannig ég ákvað af einhverjum heimskulegum ástæðum að hafa bílinn í gangi til þess að Snabba yrði ekki kalt á meðan,“ segir Martina sem játar að það hafi verið hugsunarleysi að skilja bílinn eftir í gangi.
„Maður er samt svo oft bara værukær, og hugsar að svona lagað komi ekki fyrir mann,“ útskýrir hún og er eflaust hægt að taka undir þau orð.
Bílnum var stolið í Skeifunni og virðist þjófurinn hafa hent Snabba út úr bílnum skammt frá.
Martina útskýrir að þetta var sjö um kvöld og ansi kalt úti.
„Við hringdum auðvitað á lögregluna, en við vorum nú aðallega að hugsa um Snabba,“ segir Martina sem gat varla á heilum sér tekið. Sem betur fer þá barst símtal um klukkustund síðar.
„Þá hafði eitthvað fólk verið á röltinu í Ármúlanum og rekið augun í Snabba,“ segir Martina en Snabbi var vel merktur sem betur fer.
Þegar Snabbi var loksins komin í faðm fjölskyldunnar á ný átti enn eftir að finna bílinn.
„Lögreglan hafði svo samband einhverjum þremur tímum síðar,“ segir Martina en þá var bíllinn fundinn. Í ljós kom að þjófurinn hafði skipt um númerplötu á bílnum, ekið utan í staur eða annan bíl og enda ökuferðina á því að reyna að keyra upp Laugaveginn. Þar var hann loksins stöðvaður af lögreglunni á höfuðborgarsvæðinu.
„Það var rosalega mikil sprittlykt í bílnum þegar við fengum hann auk þess sem hann var tjónaður,“ svarar Martina þegar hún er spurð í hvaða ástandi bíllinn var þegar hún fékk hann aftur í hendurnar. Hún óttaðist þó að bíllinn væri í verra ásigkomulagi og er því tiltölulega sátt við að ekki hafi farið verr, þó litlu hefði mátt muna með hann Snabba.
Martina var þó allt annað en sátt við þjófinn og tók sig til og myndbirti hann og varðaði við honum á Facebook-síðunni „Nafngreinum og myndbirtum dýraníðinga“.
Þar kom fram að þjófurinn hafi ekki haft mikið upp úr krafsinu, annað en ökuferðina, en um fimm hundruð krónur voru í klinkskálinni.
Spurð út í myndbirtinguna, svarar Martina að hún hafi litið svo á að henni fyndist fullt tilefni til þess að vara við manninum.
„Og ég er ekkert að fara að fjarlægja þessa mynd,“ segir hún svo að lokum.