Héraðssaksóknari hefur fellt niður mál tveggja manna sem voru kærðir fyrir nauðgun sem átti að hafa átt sér stað í Hlíðunum í október á síðasta ári. Þetta staðfestir Vilhjálmur H. Vilhjálmsson í samtali við RÚV.

Málið vakti mikla reiði í samfélaginu eftir að Fréttablaðið birti frétt um það íbúðin, þar sem kynferðisofbeldið átti að hafa átt sér stað, hafi verið útbúin til nauðgana. Þá kom fram að ekki var farið fram á gæsluvarðhald yfir mönnunum vegna málsins, sem leiddi af sér mótmæli fyrir utan lögreglustöðina á Hverfisgötu.

Á RÚV segir svo að þrjár aðrar kærur tengjast þessu máli – til að mynda er nauðgunarkæra gegn öðrum manninum enn til meðferðar hjá héraðssaksóknara. Þá lagði verjandi mannanna fram kærur gegn konunum tveimur – meðal annars fyrir rangar sakargiftir.

Ekki náðist í Vilhjálm við vinnslu fréttarinnar.