Borgarráð Reykjavíkur samþykkti á fundi sínum í gær að ganga til viðræðna við Hjálpræðisherinn sem vill fá úthlutað lóðunum að Suðurlandsbraut 72 og 74 í Sogamýri. Þá vilja þeir einnig að lóðirnar verði sameinaðar og byggingarmagn sameinaðrar lóðar verði aðlagað að þörfum Hjálpræðishersins.

Á fundinum var lagt er til að skrifstofu eigna og atvinnuþróunar og umhverfis- og skipulagssviði yrði falið að hefja viðræður við Hjálpræðisherinn um nauðsynlegar breytingar á skipulagi og eðlilegt endurgjald fyrir lóðirnar.

Hjálpræðisherinn seldi höfuðstöðvar sínar í miðbænum á dögunum fyrir ríflega hálfan milljarð króna. Hjálpræðisherinn verður með samkomustað í Mjódd þar til nýtt húsnæði rís.