Atvinnubílstjórar senda myndbönd sín á milli – „Kolólöglegt“ segir rannsóknastjóri umferðarslysa
„Krakkar ekki gera þetta heima hjá ykkur,“ segir atvinnubílstjóri í myndbandi á meðan hann heldur á fullri skál af graut við akstur í myrkri.
Þetta er aðeins eitt af mörgum myndböndum sem atvinnubílstjórar á stórum og þungum flutningabifreiðum hér á landi hafa tekið upp á farsíma og sent sín á milli. Fjallað verður um slík myndbönd í Kastljósþætti kvöldsins en þau virðast vera orðin ansi vinsæl á meðal atvinnubílstjóra.
Kastljós hefur safnað saman fjölda þessara myndbanda, sem send voru í gegnum samskiptaforritið Snapchat eða birt á Facebook.
Á myndböndunum má sjá þegar bílstjórar taka upp hraðakstur, glannalegan framúrakstur og akstur við erfiðar aðstæður. Myndböndin eru tekin innan sem utanbæjar og í nokkrum þeirra beina bílstjórarnir jafnvel símanum að sjálfum sér við aksturinn.
Rætt verður við Ágúst Mogensen, rannsóknastjóra hjá Rannsóknarnefnd samgönguslysa. Ágúst var fenginn til að skoða myndböndin en hann hefur undanfarin tíu ár rannsakað og mætt á vettvang allra banaslysa í umferðinni á Íslandi.
Ágúst segir að slíkar upptökur séu „kolólöglegar“ og segir viðhorf bílstjóranna „brenglað.“ Enda er notkun farsíma við akstur ólögleg, sama í hvaða formi hún er. Vitað er að símanotkun hefur orsakað banaslys hér á landi og verið meginþáttur í fjölda alvarlegra slysa.
Hér má sjá samantekt af myndböndunum, sem sýnd verða í Kastljósþætti kvöldsins.