Björgunarsveitir stóðu í ströngu í gær þar sem björgunarsveitarmenn komu ferðamönnum og sjúkraflutningamönnum til aðstoðar
Sjúkrabíll á leið yfir Oddskarð fauk útaf veginum um klukkan 21:00 í gær og sat þar fastur að því er fram kemur í tilkynningu frá Landsbjörg.
Björgunarsveitin Brimrún frá Eskifirði fór á staðinn og aðstoðaði við að ná sjúkrabílnum aftur upp á veg svo hann gæti haldið áfram ferð sinni til Egilsstaða.
Síðar um kvöldið var tilkynnt um fastan bíl við Bláa Lónið, þar var ferðafólk í vanda. Einnig var bátur að losna frá bryggju á Reyðarfirði, hurð á sundlauginni á Bolungarvík fauk upp sem og gluggi á leikskólanum á Suðureyri.
Þar fauk landgangur við flotbryggju í höfninni en ekkert verður gert í því fyrr en veður lægir.
Erlendir ferðalangar sátu fastir í ófærð utan við Vopnafjörð og rúða brotnaði í Menntaskólanum á Egilsstöðum.
Á fimmta tug björgunarmanna hafa komið að þessum aðgerðum.
Ofsaveður er á Vestfjörðum og verður fram til klukkan 9 eða 10. Þetta segir í athugasemd veðurfræðings á vef Vegagerðarinnar í morgun. Þar segir að ofsaveðrið nái einnig inn á vestanvert Norðurland en upp úr hádegi muni lægja talsvert.
Á meðan verður þó áfram heldur hvasst, 15 til 20 m/s, um landið vestanvert ásamt því að nokkuð dimm él munu verða á Vestur – og Suðvesturlandi.
Færð á vegum landsins er nokkuð í samræmi við veðrið. Víða er hálka og fjallvegir eru að stórum hluta ófærir að svo stöddu, sérstaklega á Vestfjörðum og á Norðurlandi.