Önnur þáttaröð Ófærðar á frumstigi

Byrjað að leggja drög að söguþræði - Næsta stóra verkefni tengist Kötlugosi

Vonir standa til að unnendur þáttaraðarinnar geti fylgst með fleiri ævintýrum lögregluþjónsins Andra og undirsáta hans.
Ófærð Vonir standa til að unnendur þáttaraðarinnar geti fylgst með fleiri ævintýrum lögregluþjónsins Andra og undirsáta hans.

Sjónvarpsþáttaröðin Ófærð nýtur fádæma vinsælda og framleiðendur dreymir um að framhald líti dagsins ljós. Verkefnið er á frumstigi og snýst aðallega um að leggja línurnar varðandi söguþráð. „Allur bransinn mun græða á velgengni Ófærðar,“ segir Magnús Viðar Sigurðsson, framkvæmdastjóri RVK Studios og aðalframleiðandi sjónvarpseríunnar Ófærðar ásamt Baltasar Kormáki. Næsta verkefni verða sjónvarpsþættir sem byggjast á atburðum í skugga Kötlugoss og verður verkefni af svipaðri stærðargráðu og Ófærð.

Vinsældir erlendis

Sýningar á Ófærð hófust nýlega í Bretlandi og Frakklandi þar sem sjónvarpsstöðvarnar BBC og France 2 gera þáttaröðinni hátt undir höfði með því að sýna hana á góðum tíma í dagskrá sinni. Ófærð hefur svo sannarlega staðið undir því trausti því gagnrýnendur hafa ausið þættina lofi og áhorfstölur sýna að þátturinn er að falla vel í kramið hjá almenningi.

„Það sem er sérstakt er að þessar stóru sjónvarpsstöðvar keyptu réttinn að þáttunum á handritsstigi og eru þar með titlaðir sem meðframleiðendur. Það er algengara að slíkir þættir séu keyptir á síðari stigum, þegar hægt er að taka ákvörðun út frá fullunninni vöru. Eftir að þessar sjónvarpsstöðvar sjá síðan útkomuna þá er tekin ákvörðun um að treysta þessum þáttum til þess að standa undir þessu góða plássi í dagskránni,“ segir Magnús Viðar.

Framkvæmdastjóri RVK Studios er himinlifandi með viðtökurnar á Ófærð.
Magnús Viðar Sigurðsson Framkvæmdastjóri RVK Studios er himinlifandi með viðtökurnar á Ófærð.

Gjörbreytt landslag vestra

Bandaríkjamarkaður er handan við hornið og þar í landi hefur Weinstein Company keypt dreifingarréttinn. „Það liggur ekki alveg fyrir hvar þættirnir verða sýndir í Bandaríkjunum en það koma nokkrir aðilar til greina. Þetta áhorf og þessi gagnrýni sem þættirnir eru að fá á þessum stóru evrópsku mörkuðum mun hjálpa til við það,“ segir Magnús Viðar. Hann segir að Bandaríkjamenn hafi tekið skandinavískum sjónvarpsþáttum vel. „Aðrir þættir hafa rutt fyrir okkur brautina og Ameríkaninn er orðinn opnari fyrir því að horfa á sjónvarpsefni með texta. Áður fyrr var erfitt að komast inn á þennan markað en Netflix, HBO og þessar kapalsjónvarpsstöðvar hafa gjörbreytt landslaginu.“

Staðist allar gæðakröfur

Að sögn Magnúsar Viðars er framleiðsla Ófærðar ígildi þess að gera fimm kvikmyndir í fullri lengd og því sé mikil þekking og kunnátta að skapast hérlendis varðandi slíka framleiðslu. Tökurnar hafi verið afar umfangsmiklar en mikil vinna sé fólgin í eftirvinnslunni og ekki sér fyrir endann á henni. „Þegar þessar stóru sjónvarpsstöðvar spyrja hvort þættirnir geti verið tilbúnir á tilteknum tíma þá segir maður einfaldlega já,“ segir Magnús Viðar og hlær. Um þrjátíu manns hafi komið að þeirri vinnu og hópurinn sé að leggja lokahönd á þýsku útgáfu þáttanna sem verður skilað fljótlega. „Við erum að senda þættina stundum á síðustu stundu en allt hefur gengið upp. Það er sérstakt fyrirtæki sem sér um að gæðaprufa sjónvarpsefni sem þetta og við höfum staðist allar þær kröfur, sem er mjög ánægjulegt,“ segir Magnús Viðar.

„Mér leið ekki vel“

„Mér leið ekki vel. Ég var kominn á símafund eftir þrettán sekúndur,“ segir Magnús Viðar og hlær þegar blaðamaður innir hann um viðbrögð hans við því að rangt atriði fór í loftið í tengslum við alræmda þyrluferð í sjötta þætti Ófærðar. „Að öllu gamni slepptu þá var rosalega leiðinlegt að þessi handvömm skyldi eiga sér stað hjá Ríkisútvarpinu. Aðdragandinn var langur en áður höfðum við sent RÚV ókláraðan þátt til þess að þeir gætu skoðað hann. Við vorum mjög seinir að senda þeim lokaútgáfuna og svo fer að það gleymist að skipta þættinum út í útsendingarkerfi þeirra.“ Hann segir leiðinlegt að svona hafi farið en það sé líklega til marks um þá athygli sem þjóðin veiti þáttunum að þetta tiltekna atriði verði að blaðamáli. „Ég hef framleitt 15 leiknar seríur og 400 klukkustundir af öðru sjónvarpsefni. Ég hef aldrei nokkurn tímann vitað til þess að eitt atriði fái svona mikil viðbrögð,“ segir Magnús Viðar.

Mikil áhætta

Ófærð er stærsta sjónvarpsverkefni sem íslenskir aðilar hafa ráðist í og er heildarkostnaður verkefnisins um einn milljarður króna. Í ljósi góðs gengis er því rétt að spyrja hvort framleiðendur komi til með að hagnast á verkefninu. „Það er góð spurning en enn sem komið er þá verð ég að segja að það komi í ljós. Við fjármögnum verkefnið og leggjum fram eigið framlag. Tekjurnar skila sér ekki fyrr en allt efnið hefur verið afhent og því verður maður ekki rólegur fyrr en síðasti ramminn er kominn úr húsi,“ segir Magnús Viðar og verst því fimlega að gefa upp frekari upplýsingar um fjármálin.

Ófærð 2 á teikniborðinu

Hann viðurkennir þó fúslega að fjölmargar dyr hafi opnast í kjölfar Ófærðar og spennandi verkefni eru í bígerð. „Við erum byrjaðir að vinna að næsta stóra verkefni sem heitir „Katla“ og fjallar um afleiðingar þess ef Katla fer að gjósa. Það er verkefni sem við erum byrjaðir með í fjármögnun og verður af svipaðri stærðargráðu og Ófærð. Það er mikill áhugi erlendis frá á því verkefni. Einnig komum við að verkefni með Stöð 2 og Jóni Gnarr sem heitir „Borgarstjórinn“,“ segir Magnús Viðar. Stóri draumurinn sé hins vegar að framleiða Ófærð 2. „Við erum farin að hugsa söguþráðinn hérna innanhús en að öðru leyti er það verkefni algjörlega á frumstigi,“ segir Magnús Viðar.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.