Margir eru slasaðir og klettur hrundi í sjóinn eftir jarðskjálfta í borginni Christchurch á Nýja-Sjálandi í nótt, nánast 5 árum eftir að jarðskjálfti lagði miðborg Christchurch í rúst. Sjálftinn sem var af stærðinni 5,8 á richter átti upptök sín í sjónum 17 km fyrir utan borgina og skall á um kl.13 eða rétt eftir miðnætti á íslenskum tíma.
Samkvæmt nýsjálenska dagblaðinu NZ Herald þá hlutu nokkrir minniháttar meiðsl eftir að hafa dottið en engra er saknað. Mikið af varningi datt úr búðarhillum en ekki er enn hægt að meta tjónið. Mikil mildi þykir að ekki hafi farið verr en 185 manns létust í skjálftanum árið 2011 sem var af stærðinni 6,3. Nýja-Sjáland, líkt og Ísland, liggur á flekamörkum sem gerir jarðskjálfta algenga.
Eftirfarandi myndband var birt á Youtube í nótt og sýnir yfirlitsmynd yfir skemmdirnar úr dróna.
[youtube https://www.youtube.com/watch?v=KOKRU9Fd5f8&w=640&h=360]