Breskur stærðfræðikennari, Michael White, reyndi í tíu klukkustundir að tæla tólf ára stúlku, áður en hann sendi henni nektarmynd af sér. Móðir stúlkunnar sá samskiptin og kærði manninn, sem nú hefur verið dæmdur til þriggja ára og fjögurra mánaða fangelsisrefsingar. Með því hafði stærðfræðikennarinn ekki reiknað.

Í tíu klukkustundir reyndi hann stúlkunni berorðar lýsingar á kynferðislegum athöfnum sem hann vildi eiga með henni en dómarinn í málinu, Anthony Goldstaub, sagði að með athæfi sínu hefði hann haft mikil áhrif á skólann, stúlkuna og fjölskyldu stúlkunnar. „Þú misnotaðir það traust sem foreldrar hennar og skólinn báru til þín. Þeir sem það gera mega búast við því að fara í fangelsi.“

White hafði þegar sagt upp störfum þegar málið kom upp en var látinn hætta samstundis. Þetta var í lok mars 2014 en White kenndi við Tendring Technology College í Essex.

Verjandi mannsins, Cyrus Schrof, sagði fyrir dómi að White ætti erfitt með að skýra gjörðir sínar. „Þetta var ólíkt honum og gerðist algjörlega án fyrirvara. Hann á erfitt með að skilja hvað leiddi til þess að hann átti þessar samræður við stúlkuna. Þetta hefur eyðilagt líf hans og var bæði heimskulegt og kjánalegt.“

White gekkst við því að hafa reynt að fá stúlkuna til kynferðislegs samneytis við sig. Hann má ekki starfa við neitt sem tengist börnum næstu tíu árin auk þess sem hann verður ævilangt á skrá yfir kynferðisbrotamenn.