„Börnin reyndu að breyta hreimnum svo fólk uppgötvaði ekki að þau væru frá Sýrlandi,“ segir Fayrouz Abdl Rahman Nouh í samtali við Akureyri vikublað um nöturlega dvöl fjölskyldu sinnar sem flóttamenn í Líbanon. Fyrsta tölublað nýs ritstjóra, Indíönu Ásu Hreinsdóttur, er komið út fyrir norðan en hún hefur undanfarinn áratug starfað á DV.

Í viðtalinu ræðir Indíana við hjón með tvö börn, sem sest eru að á Akureyri, eftir að hafa þurft að flýja heimili sitt, sem var í borginni Homs í Sýrlandi. Mágur þeirra hjálpaði þeim í Líbanon en þar eru Sýrlendingar í stórum stíl og eru ekki velkomnir. „Eina leiðin til að geta verið þar var að tala ekki við neinn, fara undan í flæmingi og láta allt yfir sig ganga.“ Lykilatriði var að fólk uppgötvaði ekki að þau væru frá Sýrlandi.

Fjölskyldan var farin að íhuga að reyna að snúa aftur til Sýrlands þegar þeim bauðst að flytja til Íslands. „Þegar maðurinn minn sagði mér að okkur hefði verið boðið hingað dansaði ég og hló. Ég vissi ekkert um landið en var svo ánægð. Börnin skildu ekkert hvað var í gangi,“ segir hún í viðtalinu en þau bíða þess enn að börnin byrji í skóla.

Á Akureyri hafa móttökurnar verið framar björtustu vonum fjölskyldunnar. „Við bjuggumst við að finna að við værum velkomin en aldrei datt okkur í hug að móttökurnar yrðu svona. Við erum heppin og svo þakklát.“