Hæstiréttur Íslands staðfesti í dag gæsluvarðhald yfir karlmanni vegna gruns um gróft og ítrekað ofbeldi gegn sambýliskonu sinni. Meðal annars braut maðurinn jaxl í konunni þegar hann sló hana þungu höggi, en í kjölfarið neyddi hann hana til munnmaka. Hún baðst undan því, og úr varð að maðurinn nauðgaði henni meðal annars í endaþarm.

Lýsingar konunnar á ofbeldinu eru skelfilegar, meðal annars lýsir hún því hvernig hann gerði sig líklegan til þess að kasta henni fram af svölum íbúðarinnar þegar hún reyndi að flýja íbúðina.

Þá sakaði hann konuna um að hafa birt mynd af sér nakinni á samskiptamiðlum, en hún neitaði því alfarið. Tók hann myndir af kynfærum konunnar og rassi auk þess sem hann skoðaði kynfærin með vasaljósi þegar hún reyndi að segja honum að myndin væri ekki af henni, þar sem hún hefði rifnað við fæðingu. Segir konan að þetta hafi verið svo óþægilegt að hún hafi farið að gráta.

Konan fór í skoðun neyðarmóttöku fyrir þolendur kynferðisofbeldis. Samkvæmt vottorði þaðan lýsti hún atburðum þar á sama hátt og hún hefur gerði í skýrslutöku hjá lögreglu. Í vottorði kom fram að hún væri með mar á höfði, bæði enni og hársverði og brotinn jaxl í efri góm vinstra megin. Þá var hún með eymsli víða um líkamann sem samsvari lýsingum um barsmíðar.

Við þetta má bæta að ungt barn hennar varð vitni að ofbeldinu.

Maðurinn er grunaður um að hafa svipt hana frelsi, beitt hana líkamlegu og kynferðislegu ofbeldi, og brotin geta varðað allt að 16 ára fangelsi.

Maðurinn skal því sæta gæsluvarðhaldi til 2. mars næstkomandi.