Vill að borgin hætti að rukka fyrir mat í skólum
„Þetta er hræðilegt mál,“ segir Sóley Tómasdóttir, borgarfulltrúi Vinstri grænna um pítsuveisluna í Fellaskóla, en Fréttablaðið greindi frá því fyrst miðla í morgun að ellefu ára gamalli stúlku hefði verið meinað um pítsusneið vegna stífra reglna um mataráskrift.
Dagur B. Eggertsson, borgarstjóri, sagði á Facebook í morgun að það hefði hreinlega fokið í hann þegar hann las þessa frétt í morgun. Af þeim ástæðum hefur hann óskað formlega eftir skýringum á málinu hjá Skóla- og frístundasviði.
Sóley segir á Facebook-síðu sinni:
„Í Reykjavík hefur það verið skýr stefna að engu barni skuli neitað um mat, hvorki vegna efnahags eða annarra ástæðna.“
Hún segir að þannig verði það þó aldrei í alvörunni fyrr en borgin hættir að rukka sérstaklega fyrir þessa grundvallarþjónustu.
„Grunnþjónusta við börn á að vera gjaldfrjáls – kostnaður vegna hennar á að koma úr sameiginlegum sjóðum – greiðast með útsvarinu,“ segir Sóley að lokum.