Þungfært á Breiðamerkursandi – Hiti undir frostmark um helgina – Snjókoma eða slydda í dag
„Í dag hvessir nokkuð duglega af suðaustri á austanverðu landinu. Með suðaustlægri áttinni berst heldur mildara loft inn yfir austanvert landið en verið hefur, og dregur þá víðast hvar úr frosti.“
Þetta segir veðurfræðingur í athugasemd á vef Veðurstofu Íslands í morgun.
Samkvæmt veðurfræðingi Veðurstofunnar verðu má búast við allt að fimm stiga hita á láglendi suðaustan- og austanlands en áfram er frost í fjallahæð. Þá sé talsverð úrkoma í kortunum suðaustanlands, snjókoma til fjalla en slydda á láglendi, jafnvel rigning sums staðar.
Austan og norðaustanlands er snjómugga víða og einnig má búast við stöku éljum suðvestanlands, en þar er þó mun hægari vindur. Á Vestfjörðum og Norðvesturlandi er einna helst þurrt og bjart.
Þá segir veðurfræðingur veðurstofunnar að á morgun fari aftur að klóna og fer hitinn víða undir frostmark um helgina. Eftir helgi ætti svo að hlýna á ný.
Á vef Vegagerðarinnar segir að víða sé hálka á þjóðvegum landsins. Þá er éljagangur víðasta hvar eða snjókoma.
Hálkublettir eru á Sandskeiði og í Þrengslum en hálka og éljagangur á Hellisheiði. Hálka og hálkublettir eru á Suðurlandi. Hálkublettir og éljagangur er á Reykjanesbraut og Reykjanesi.
Hálka er á Vesturlandi og Vestfjörðum og sums staðar snjóþekja og éljagangur.
Það éljar eða snjóar á Norðurlandi og þar er snjóþekja eða hálka víðast hvar. Þæfingsfærð og skafrenningur er á Öxnadalsheiði og Víkurskarði. Ófært er á Hálsum og Hófaskarði.
Á Austurlandi er ófært á Fjarðarheiði, Fagradal og Vatnsskarði eystra, annars er snjóþekja og hálka víða á vegum og snjókoma. Þæfingur er á Hróarstunguvegi.
Með ströndinni suðaustanlands er þæfingsfærð en þungfært er á Breiðamerkursandi.