Baldur Guðlaugsson lögfræðingur hefur verið skipaður formaður hæfisnefndar sem á að meta umsækjendur um starf skrifstofustjóra í atvinnuvegaráðuneytinu. Þetta kemur fram á vef Kjarnans.

Ragnheiður Elín Árnadóttir, iðnaðar- og viðskiptaráðherra, skipar nefndina.

Auk Baldurs eru þau Gylfi Dalmann Aðalsteinsson, dósent við viðskiptafræðideild Háskóla Íslands, og Helga Hlín Hákonardóttir lögfræðingur, einnig í nefndinni.

Starfið sem um ræðir er starf skrifstofustjóra viðskipta-, nýsköpunar og ferðaþjónustu, en það var nýlega auglýst laust til umsóknar. Alls sóttu 38 manns um starfið, samkvæmt vef Kjarnans.

Baldur var dæmdur í tveggja ára fangelsi í Hæstarétti fyrir að hafa notað innherjaupplýsingar sem hann hafði aðgang að vegna starfs síns sem ráðuneytisstjóri í fjármálaráðuneytinu til að koma í veg fyrir 190 milljóna króna tap á hlutabréfum sem hann átti í Landsbankanum. Brotin sem Baldur var dæmdur fyrir í héraðsdómi varða allt að níu ára fangelsisrefsingu.

Bréfin seldi Baldur þremur vikum fyrir efnahagshrunið haustið 2008 en hann hafði setið í samráðshóp á vegum ráðuneytanna sem fjallaði meðal annars um aðgerðir sem gripið yrði til kæmi til þess að einhver viðskiptabankanna færi í þrot.

Athygli vakti árið 2012 að Baldur afplánaði refsingu sína á Vernd en starfaði á daginn hjá lögmannsstofunni Lex.