Að minnsta kosti 52 eru látnir eftir að óeirðir brutust út í Topo Chico-fangelsinu í borginni Monterrey í norðurhluta Mexíkó í dag. Eldur kviknaði í fangelsinu í kjölfarið, en ekki liggur fyrir hversu margir slösuðust í óeirðunum.

Samkvæmt frétt AP hófust óeirðirnar skömmu eftir miðnætti að staðartíma, eða um sex leytið í morgun að íslenskum tíma. AP segir frá því að svo virðist sem eldurinn hafi kviknað eftir að fangar kveiktu í dýnum og fleiru lauslegu innan veggja fangelsisins. Fjölmargir söfnuðust saman fyrir utan fangelsið og kröfðust þess að fá upplýsingar um afdrif ástvina sinna.

Fangelsismál í Mexíkó hafa lengi verið í lamasessi og í skýrslu frá árinu 2013 sem AP vitnar til kom fram að 65 fangelsum af 101 hafi verið stjórnað af föngum, ekki fangelsisyfirvöldum. Um var að ræða skýrslu sem tók til fjölmennustu fangelsa landsins. Þá eru þau yfirfull og aðbúnaður þykir slæmur.

Árið 2012 léstu 44 fangar í óeirðum sem brutust út í Apodaca í Nuevo Leon. Eftir óeirðirnar voru þrír yfirmenn fangelsisins og 26 fangaverðir sakaðir um að hjálpa föngum að strjúka meðan óeirðirnar stóðu yfir.