Sendi tólf ára stúlku nektarmyndir af sér
Tuttugu og sex ára gamall karlmaður, Michael White, hefur verið dæmdur í þriggja ára fangelsi fyrir að senda tólf ára stúlku nektarmyndir af sér. White, sem er stærðfræðikennari, starfaði fyrir Tendring Technology College á Englandi þegar atvikið átti sér stað.
„Það sem þú gerðir hefur haft víðtæk áhrif á skólann og fjölskyldu stúlkunnar. Þú misnotaðir traustið sem foreldrar og skólinn lögðu á þig. Þeir sem gera slíkt geta átt von á því að fara í fangelsi,“ sagði dómarinn, Anthony Goldstaub, áður en hann kvað upp þriggja ára og fjögurra mánaða fangelsisdóm yfir manninum.
Við réttarhöldin kom fram að maðurinn hafði átt í tíu klukkustunda spjalli við stúlkuna þar sem hann lýsti því í smáatriðum hvað hann vildi gera við hana. Hann sendi henni svo nektarmyndir af sér. Móðir stúlkunnar sá skilaboðin frá honum í spjaldtölvu dóttur sinnar og hafði samband við lögreglu.
Verjandi White sagði að skjólstæðingur sinn væri eyðilagður vegna málsins, það hefði haft víðtæk áhrif á sálarlíf hans og það sem hann gerði hefði „verið úr karakter“. Það kom þó ekki í veg fyrir óskilorðsbundna fangelsisrefsingu. White hafði sagt upp störfum áður en skólayfirvöldum varð kunnugt um málið.
White játaði sök fyrir dómi.