Rannsókn málsins enn á frumstigi – Hóparnir hugsanlega tengdir erlendri glæpastarfsemi hér á landi
Hóparnir sem slógust með vopnum í Skeifunni síðastliðinn laugardag voru báðir frá Austur-Evrópu. Samkvæmt heimildarmanni DV samanstóð annar hópurinn af mönnum frá Litháen og hinn frá Rússlandi.
Greint var frá því í Morgunblaðinu í gær að hópslagsmálin, sem hátt í 30 manns tóku þátt í, hafi verið á milli tveggja erlendra hópa af sitt hvoru þjóðerni. Þar var haft eftir Friðriki Smára Björgvinssyni, yfirlögregluþjóni, sem sagði að „eitthvert atvik sem átti sér stað fyrir nokkrum dögum var kveikjan að málinu.“
DV ræddi við Friðrik Smára í dag sem sagði að rannsókn málsins væri á frumstigi. Friðrik gat ekki greint frá þjóðerni manna né gefið upp hver kveikjan að málinu hefði verið.
Samkvæmt heimildarmanni DV, sem þekkir vel til í undirheimunum, er ekki um átök á milli tveggja erlendra glæpagengja að ræða. Svo virðist sem að slagsmálin hafi ekki verið skipulögð.
Þau hafi atvikast eftir að einstaklingur kallaði til vini sína til að ráðast á annan mann sem hann sá hann fyrir utan Rúmfatalagerinn í Skeifunni, en mennirnir höfðu átt í deilum.
Sá maður kallaði einnig eftir aðstoð sinna vina og þannig hafi slagsmál á milli hópanna hafist.
Eins og DV greindi frá urðu fjölmargir vitni að átökunum, þar á meðal börn. Þá hefur einnig komið fram að einstaklingar hafi notað hafnaboltakylfu, hamar og hníf í átökunum.
Slagsmálunum lauk svo eftir að lögreglan mætti á vettvang og voru fjórir handteknir.
Þó ekki hafi verið um tvö erlend glæpagengi að ræða hefur DV þó heimildir fyrir því að aðilar í báðum hópum tengist erlendri glæpastarfsemi hér á landi.
Í mati ríkislögreglustjóra á skipulagðri glæpastarfsemi, frá því í september í fyrra, segir að hér á landi séu starfandi glæpahópar sem eiga rætur að rekja til Mið- og Austur-Evrópu og Austur-Asíu.
Þar segir að takmarkaðar rannsóknir hafi farið fram seinni ár hvað varðar erlenda afbrotahópa.
„Brotastarfsemi erlendra hópa telst því að verulegum hluta falin og lítt þekkt,“ segir í matinu.