Hugbúnaðarverkfræðingur notaði forrit sem skannaði Biblíuna og Kóraninn
Greining á því hvort Biblían eða Kóraninn er ofbeldisfyllri leiðir í ljós að meira ofbeldi er að finna í Biblíunni. Þetta er að minnsta kosti niðurstaða hugbúnaðarverkfræðingsins Toms Anderson sem lagðist í rannsóknarvinnu til að leiða þetta vinsæla þrætuepli til lykta.
Breska blaðið Independent greinir frá þessu, en þar kemur fram að Tom hafi lagst í þessa vinnu í kjölfar ásakana hjá misvirtum álitsgjöfum að hryðjuverk öfgafullra íslamstrúarmanna megi rekja til þess ofbeldis sem finna má í helgasta riti Múhameðstrúar, Kóraninum.
Anderson notaðist við hugbúnað, Odin Text, til að skanna innihald enskrar útgáfu Biblíunnar, Gamla og Nýja testamentið, og svo notaðist hann við eintak af Kóraninum frá árinu 1957. Það tók hugbúnaðinn aðeins tvær mínútur að lesa og greina innihald þessara tveggja helgu rita. Öllum orðunum í ritunum var raðað í átta flokka: gleði, eftirvæntingu, reiði, andstyggð, sorg, undrun, ótta/hræðslu og traust. Í ljós kom að Biblían skoraði mun hærra en Kóraninn í flokkunum reiði og mun lægra í flokknum traust. Með öðrum orðum mátt flokka hlutfallslega fleiri orð í Biblíunni í flokkinn reiði en færri í flokkinn traust.
Anderson gerði frekari greiningu á niðurstöðunum og í ljós kom að mun meira ofbeldi var að finna í Gamla testamentinu en því nýja. Ofbeldið var tvöfalt meira í Gamla testamentinu í samanburði við Kóraninum. „Af þessum þremur ritum (Gamla testamentinu, Nýja testamentinu og Kóraninum) er mest ofbeldi í Gamla testamentinu,“ segir Anderson í bloggfærslu sem Independent vitnar til.
Anderson tekur þó fram að niðurstöðurnar séu engin sönnun fyrir því að meira eða minna ofbeldi sé í Biblíunni en Kóraninum, eða öfugt. „Við vitum að Gamla- og Nýja Testamentið og Kóraninn eru ekki einu helgirit íslam, kristni eða gyðingdóms […] Ég legg einnig á það áherslu að þessi greining er yfirborðskennd og niðurstöðurnar ekki afdráttarlausar.“