Utanríkisráðherra segir að stöðugt sé rætt við bandarísk stjórnvöld um varnir Íslands – „Mjög auðvelt að misskilja þessa hluti“
Gunnar Bragi Sveinsson, utanríkisráðherra, segir að ekki hafi verið rætt að fjölmennt herlið Bandaríkjamanna muni hafa hér fasta setu líkt og hann gerði um árabil.
„Það er ekkert í myndinni að hér verði tvö til þrjú þúsund manns með fasta viðveru og fullt af vélum. Það er mjög auðvelt að misskilja þessa hluti.“
Frá þessu greindi Gunnar Bragi í Morgunútvarpi Rásar 2 í morgun. Þar sagði hann hins vegar að sé stöðugt rætt um varnir Íslands við bandarísk stjórnvöld.
Greint frá því í gær að bandaríski herinn hefði óskað eftir fjármagni til þess að koma sér upp aðstöðu á gömlu herstöðinni á Keflavíkurflugvelli samkvæmt bandaríska hertímaritinu Stars and Stripes.
Sjá einnig: Bandaríski herinn vill koma aftur til Reykjanesbæjar
Gunnar Bragi sagði að engar viðræður hafi átt sér stað á milli íslenskra og bandaríska stjórnvalda um að bandaríski herinn verði hér aftur til lengri tíma. Gunnar gat þó ekki sagt hvort að þær viðræður myndu hefjast á næstunni.
„Við vitum ekki hvað gerist í framtíðinni, það er breytt öryggisumhverfi í Evrópu. Við verðum bara að sjá hvað setur. En ef það á að fara í útvíkkun á þessari starfsemi sem þarna er þá þarf að ræða það við okkur.“
Í grein Stars and Stripes segir að herinn vilji koma upp aðstöðu hér á landi en um er að ræða tímabundið eftirlit P-8A Poseidon eftirlitsflugvéla til þess að fylgjast með kafbátaumferð um Atlantshafið.
Gunnar sagði að undanfarin tvö til þrjú ár hafi umferð slíkra flugvéla um Keflavíkurflugvöll aukist og að íslensk stjórnvöld hafi lagt áherslu á að meiri vöktun við landið. Í loftrýmisgæslu við Ísland eru nú þrjár vaktir og gerir Gunnar ráð fyrir að þeim muni fjölga.
„Við gerum ráð fyrir og höfum óskað eftir að þær verði fjórar árið 2017. Við fögnum því líka að það verði aukin umsvif. Það styrkir okkar varnir og okkar öryggi,“ sagði Gunnar Bragi og bætti við síðar í viðtalinu:
„Þarna er einfaldlega verið að tala um að gera nauðsynlegar breytingar á flugskýlum svo að nýrri vélar geti komið og fengið viðhald og slíkt.“