Reynsluboltar í íslenskri blaðamennsku deila frásögnum sínum og sjónarmiðum
Blaðamannafélag Íslands hefur gefið út bókina Í hörðum slag en þar greina 15 þjóðþekktir íslenskir blaðamenn frá sjónarmiðum sínum og reynslu af blaðamennsku á seinni hluta 20. aldar og upphafi þessarar aldar. Útgáfu bókarinnar var fagnað nú í dag og var ljósmyndari DV á staðnum þar sem meðfylgjandi myndir voru teknar.
Guðrún Guðlaugsdóttir er höfundur viðtalanna sem birtast í bókinni og segir í tilkynningu að hún nái af næmni að skyggnast með viðmælendum sínum baksviðs í frétta- og þjóðmálaumræðu á miklum umbrotatímum í Íslandssögunnar. Þannig gefist einstakt tækifæri til að kynnast samtímis mikilvægum vendingum í fjölmiðlun á Íslandi og kynnast einstaklingum sem öðrum fremur hafa stjórnað upplýsingastreymi til almennings áratugum saman.
„Viðtölunum fylgja nýjar glæsilegar protrettmyndir Kristins Ingvarssonar af viðmælendum. Bókin hefur einnig að geyma einstakan ljósmyndakafla sem byggir á fréttaljósmyndasafni Gunnars V. Andréssonar sem hefur skráð með myndrænum hætti sögu þjóðarinnar í 50 ár,“ kemur jafnframt fram í tilkynningunni en bókinni lýkur á fræðilegri samantekt um fagvæðingu blaðamannastéttarinnar, sem Birgir Guðmundsson dósent við Háskólann á Akureyri skrifar, en hann er jafnframt ritstjóri bókarinnar.
Viðmælendur Guðrúnar eru Björn Vignir Sigurpálsson, Magnús Finnsson, Steinar J Lúðvíksson, Kári Jónasson, Ingvi Hrafn Jónsson, Freysteinn Jóhannsson, Árni Johnsen, Jóhanna Kristjónsdóttir, Styrmir Gunnarsson, Kjartan L. Pálsson, Sigtryggur Sigtryggsson, Gunnar V. Andrésson, Jóhannes Reykdal, Úlfar Þormóðsson, og Sigurdór Sigurdórsson.
Bókin kemur út í tilefni afmælis Blaðamannafélagsins sem verður 120 ára á næsta ári. Það er Blaðamannafélagið sem gefur út bókina í samvinnu við Sögur útgáfu og Háskólann á Akureyri.