Karlmaður af Vesturlandi er nú 22 milljónum ríkari eftir að hafa keypt sér lottómiða hjá N1 bensínstöðinni í Borgarnesi í lok nóvember. Vinningshafinn stoppar oft á leið sinni hjá N1 til að kaupa sér kók og ákvað að þessu sinni að taka með einn Lottómiða. Hann mun líklega seint sjá eftir því.
Í tiljynningu frá Ísleskri Getspá kemur fram að næst þegar maðurinn átti leið hjá bensínstöðinni bað hann afgreiðslumanninn að renna miðanum í gegn til að kanna hvort það væri nokkuð vinningur á miðanum sem myndi duga fyrir kókflösku. Upphæðin á miðanum ætti að sjá vinningshafanum fyrir kókflöskum út ævina en vinningurinn hljóðar upp á rúmlega 22 milljónir – skattfrjálst.
Vinningshafinn mun vera jarðbundinn maður og hyggst hann fjárfesta fyrir vinninginn. Að hans sögn er besta fjárfestingin að borga niður skuldir og það ætlar hann sér að gera og eins að klára þær framkvæmdir sem eru á heimilinu.