Nóróveirum um að kenna – „Þetta er árstíðabundin pest“
Svæsin ælupest gengur nú yfir þjóðfélagið líkt og fyrri ár. „Þetta er árstíðabundin pest og nú er kominn tími á hana. Svíarnir tala um vetrarælupest og við sjáum þetta færast í vöxt þegar nær dregur hátíðunum. Það kemur svo annað svona skot venjulega í apríl-maí og því er spurning hvort að þetta tengist auknum mannamótum í kringum jól og páska,“ segir Haraldur Briem, yfirlæknir á sóttvarnarsviði landlæknisembættisins.
Að sögn Haraldar eru það nóróveirur sem valda pestinni og gengur hún yfir á 2-3 dögum hjá heilbrigðum einstaklingum. „Hún lýsir sér í magaverkjum og niðurgangi, jafnvel uppköstum. Flestir ná sér fljótt en pestin reynist eldra fólki þungbærari,“ segir Haraldur. Að hans sögn er mikilvægt að gæta að hreinlæti eins og handþvotti sem og að passa sig að hósta ekki yfir fólk eða mat. „Fólk getur verið að smita aðra í nokkra daga eftir að það hefur náð sér af veikindunum,“ segir Haraldur.
Að mati Haraldar er pestin svipuð að umfangi og í fyrra. „Maður er hinsvegar á nálum yfir því að inflúensan komi ofan í þetta. Hún er farin að láta á sér kræla í löndunum í kringum okkur. Það hafa komið einhver tilfelli hérlendis og þá er líklegt að við förum að sjá meira af henni í lok mánaðarins,“ segir Haraldur.