Repúblikanar í Bandaríkjunum hafa í hyggju að afnema Obamacare snemma á næsta ári. Obamacare eru lög frá árinu 2010, kennd við Barrack Obama, sem tryggðu 20 milljónum Bandaríkjamanna heilbrigðistryggingu sem ekki áttu kost á henni áður.

Afnám laganna er þó vandkvæðum bundið þar sem stefnan er að halda hluta þeirra eftir. Til dæmis ákvæðinu um að fólk geti fallið undir sjúkratryggingu foreldra sinna fram að 26 ára aldri. Margir hafa einnig áhyggjur af því að algert afnám laganna geri tryggingafélögum kleift að neita fólki með undirliggjandi sjúkdóma um tryggingu.

Þrátt fyrir að lögin hafi verið umdeild frá upphafi sýna kannannir frá liðinni viku að einungis fjórðungur Bandaríkamanna vill afnema þau að fullu. 17% vildu að umfang laganna yrði minnkað en 49 vilja annað hvort halda lögunum eins og þau eru eða útvíkka þau enn frekar.

Könnunn sýndi þó að einungis 8% kjósenda sögðu að heilbrigðismál hefðu skipt mestu máli þegar þeir ákváðu hvern skyldi kjósa í síðustu kosningum.