Skiptust á upplýsingum um verð á vörum. „Ásetningurinn var mikill“
„Þetta var eins og í lygasögu. Ásetningurinn var svo mikill. Og þegar héraðsdómur dæmdi þá svo saklausa og taldi þetta venjuleg viðskipti, veistu?… Það eru bara fífl í þessum héraðsdómi. Ég gat aldrei séð að þetta færi neitt öðruvísi.“
Þetta sagði Baldur Björnsson framkvæmdastjóri múrbúðarinnar í samtali við Fréttablaðið í morgun. Á fimmtudag sakfelldi Hæstiréttur átta starfsmenn Byko og Húsasmiðjunnar fyrir ólöglegt verðsamráð. Áður hafði Héraðsdómur dæmt þá saklausa.
Í dómi Hæstaréttar segir að „talið [hafi verið]sannað með vísan til þeirra gagna sem lögð höfðu verið fram í málinu að Byko hefði upphaflega spurst fyrir um verð hjá Húsasmiðjunni í símtölum, en samskiptin síðan þróast úr því að vera einhliða í að verða gagnkvæm þar sem þeir, sem ræðst hefðu við, skiptust á upplýsingum um verð hjá fyrirtækjunum í sömu eða sambærilegum vörutegundum sem einkum hefðu tilheyrt svokallaðri grófvöru.“
„Mér finnst þessi dómur bæði illa unninn og rangur og hann veldur okkur miklum vonbrigðum og í rauninni frammistaða íslenska réttarríkisins.,“ segir Guðmundur Halldór Jónsson stjórnarformaður Byko. RÚV greinir frá.
Baldur Björnsson tilkynnti Samkeppniseftirlitinu um verðsamráð fyrirtækjanna eftir að hafa fengið heimsóknir frá starfsmönnum Byko og Húsasmiðjunnar sem reyndu að fá Múrbúðina til að taka þátt í samráðinu að sögn Baldurs.